الجزء الثاني من لقاء عبدالله محمد الوهيبي

لقاء مع أبو محمد ( عبدالله بن محمد دبلان الوهيبي )
قام بالحوار واللقاء ( حماد بن عبدالله الوهيبي ) أبو زياد

السلام عليكم ورحمته الله وبركاته….اخواني بعد لقاءنا السابق مع الوالد(حفظه الله)عبدالله محمد الوهيبي وردتني اتصالات كثيره تطالب 

بأجراء لقاءاخر وقد حرصنا على هذا اللقاء على بعض القصص القديمه التي فيها من العبر الشي

الكثير لنرى كيف اباءنا كانوا عايشين في السابق وكيف يكدحون عشان لقمة العيش فنحمد الله على 

النعمه التي نعيش فيها الان والوالد عنده من القصص الكثير كما عند اباءنا الاخرين لان هذه حياتهم

السابقه ……لا اطيل عليكم اترككم مع اللقاء


ابو محمد نشكرك على قبول استضافتنا

اهلا بكم………. وانا في خدمة ابنائي الوهيبات لاي امر من امور الدنيا وان شاء الله ما اكون ضيفثقيل عليكم

س1/هل تذكر ان مرت عليكم سنة من السنين شارفتوا على الهلاك لولا ارادة الله؟

ج1/نعم في سنة من السنين وهي عام 1387ه تقريبا كنا في اللبه (بتشديد الباء)وهي منطقه شمال

الحيانيه وكان حلالنا في ذيك السنه ضعيف لدرجة اننا في احد الايام لم تستطيع ابلنا من النهوض

الا بساعدتنا انا امسك رجل واخي راضي يمسك الرجل الاخرى ثم نذهب لليدين ونرفعها الى ان تقوم

وهكذا بباقي الابل ما عدا بكره واحده قامت بنفسها وكنا خمس بيوت بيتنا انا واخي راضي وبيت سعد

السويلم وبيت زيد السويلم وبيت عبدالله المفهد وبيت مطر هليل واخوانه فكانت حالتنا يرثى لها

وفي احد الايام اجتمعنا في بيت سعد السويلم فقلت لهم ياجماعة الخير لا يطلق علينا سنه يقولون

سنة وفاة الوهيبات واطفالهم باللبه انا ابعطيكم شورين واختاروا فيهن الأول/انا نشيل البيوت والاطفال

وننزل على ماء وننقذ الاطفال….. والحلال يجلس معه ناس يموت اللي يموت ويحيا منه اللي يحيا

والثاني/نحاول اننا نشتري سياره وننقذ اطفالنا وحلالنا……

ومع ما خلصت كلامي قال سعد السويلم رحمه الله انا اشوف اننا نشتري سياره افضل وش رايكم

انتم يالجماعه قالوا هذا الراي قال الحين يمشي عبدالله المحمد وعلي السعد(رحمه الله)يشترون

لنا سياره دين(لأن ماحد عنده فلوس تجيب سياره)ولا اعرف احد اتوقع انه بيعطينا دين الا كان بشير

الحصني بالخرج لعل وعسى يجد لنا سياره تنقذنا …قلت لخوي راضي ماعندك فلوس للطريق قال

والله ماعندي ولا ريال…… واروح لاختي ام مطر الهليل(رحمها الله)قالت والله ماعندي الا عشره ريال واخذتها………..

علي السعد(رحمه الله)التفت على ابوه وقاله ما القى عندك شي قال والله ياوليدي ماعندي ولا ريال

لكن انتم روحو مشي على الاقدام الى العويقيله وكانت تبعد عنا تقريبا 150كلم فيها واحد اسمه ناصر

الحويفي يشتغل بالجمرك لعل وعسى ان تجدون عنده ما يوصلكم للرياض اخذ علي السعد(رحمه الله)

مسدس معه وودعناهم واتكلنا على الله سبحانه وتعالى مشينا من اهلنا الصباح الى بعد المغرب

فوجدنا صاحب بيت وابتنا عنده وفي الصباح مشينا ونحن في الطريق لحقنا لوري محمل حطب اشرناله

بالوقوف قال وين يا عيال قلنا العويقيله قال انا ابغى الدويد ويبعد عن العويقيله 6كلم قال بعشره ريال

قلنا بسم الله وركبنا معه ونزلنا بالدويد قبل المغرب وذهبنا مشي وقبل نصل منازل العويقيله وجدنا

صاحب بيت في طرف البلده وابتنا عنده وفي الصباح دخلنا الديره وسألنا عن منزل ناصر الحويفي

وطرقنا الباب عليه وفتح لنا وقلطنا ما قصر واخبرناه من نكون ووش حاجتنا وقال كم يكفيكم قلنا

مائةريال فقام الرجل الله يذكره بالخير اذا هو حي والله يرحمه اذا هو ميت وقال تكفيكم قلنا نعم واخذ علي

المسدس ونزله عنده كرهن…. فرفض في البدايه ولكن نحن اقنعناه انه ليس لنا به حاجه في الطريق

وركبنا من العويقيله الى الرياض ومرينا عواد السعد بالحرس الوطني فذهب معنا الى الخرج الى

بشير الحصني واخبرناه بحالنا وحال اهلنا وقال وش ودكم به قلنا ان حصل لوري ياليت او وانيت

على الاقل…….. اهم شي ننقذ اهلنا من الحاله اللي هم فيها وفي الصباح ذهب ليبحث عن سياره لنا فلم يجد الا لوري مربطه

سسته بسبت قلنا هذا محتمل انه ما رايح يصل الى اهلنا قال والله مالقيت غيرها قال ابنه خوالي ما

وصلوا عندنا ويرجعون بدون سياره الوانيت هذا اللي مجهزينه للحج يكفي خوالي قال غالي عليهم قلنا

حنا ماهمنا انه غالي او رخيص حنا اهم شي سياره نظيفه تنقذ اهلنا وحلالهم من الموت قال بيصير

سعره عليكم 11000ريال قلنا حطه باللي تبي جاب كاتب من جيرانه مدرس وكتب السعر وحط اسمائنا كلها وقال مكفيين

شره انشاء الله…..وجزاه الله الف خير

ولما اصبحنا مشينا من عنده ويوم جاء يوم سابع يوم وحنا بالطريق بالقرب من اهلنا لقينا الحنتم هلكانين وانقذناهم قبل ان نصل

الى اهلنا وننقذهم وعند اقترابنا من البيوت وجدنا سعد السويلم واقف امام البيت سلمنا عليه قال يا علي

افزع الحق راضي وعليان راحوا للهوامله يبون يردون العويقيله والله مانلقا الا ابريق عند عبدالله

المفهد مليان…..يقول ابغاه لو يجيني ضيف اسوي له قهوة

وراح علي ولحق عليهم قبل يردون وحملنا الوانيت الروي حقت الابل وشربنا واسقينا جيراننا الحنتم

والحمدلله على كل حال
س2/كم اخذ هذا الوانيت عندكم من سنه؟

ج2/اخذ الوانيت مع السعد سنه ونصف واشتراه عيسى الصالح واخذ عنده تقريبا سنتان واشتراه

حمود الفهد واخذ عند تقريبا ثلاث سنوات واشتراه منه راضي وكده حتى رماه في قبه وجلس خربان

في قبه تقريبا عشرون سنه ويجيه واحد وقال انا ابشتريه قال بكم؟ قال اربعة الاف ريال قاله راضي رح خذه

وهذه نهاية الوانيت المبروك

س3/ما اول راتب استلمته وكم كان؟

ج3/اول راتب استلمته 150ريال بالحرس الوطني

س4/هل تذكر لنا قيمة الذبايح سابقا وقيمة الشماغ؟

ج4/كانت الذبائح تتراوح مابين الاربعين الى الستين الطيب

اما الشماغ ريالان ونصف

س5/هل تذكر لنا كيف قدت اول سياره شريتها؟

ج5/كما ذكرت في اللقاء السابق لكم ان اول سياره اشتريتها من فلاح المبارك(رحمه الله)شريتها منه

بعد المغرب وفي الصباح جاني عليان الزامل رحمه الله يبغى السياره بينتقل من مرغان للموشم

قلت له دور للسياره سواق وابشر اتى باحد عيال زيد الغازي لا اتذكر آلان هل هو غازي ام مشعل

الزيد مشينا من مرغان ولما وصلنا اهله واردت ان اذهب لاهلي قلت له ياعليان وجه السياره الى جهة

اهلي واتركني انا ابقدر اسوقها ان شاءالله ولله الحمد وصلت اهلي واقمت من بكره عندهم ومن بعده ذهبت عليها

الى مرغان……

س6/بما ان الحديث يدور حول السياره هل تذكر كيف قصيت اول رخصة قياده؟

ج6/نعم ذهبت انا وفلاح المبارك من مرغان كل واحد على سيارته الى الرس ويم جينا هناك وجدنا زحام

شديد عند المرور قدمنا اوراقنا وقالو سوف نقسمكم الى قسمين احد مع المهندس والقسم الاخر مع

الضابط وصرت انا وفلاح مع الضابط ركب الضابط مع اول سياره وكلما تسير السياره كيلو يتوقف

ويركب مع اللي بعده الا ان جانا الدور قبل عنيزه ولله الحمد نجحنا على طول

س7/هل تذكر موقف حصل معكم اثناء الاختبار؟

ج7/نعم ركب مع واحد ولما جاء احد الكباري قاله توقف فتوقف في الكوبري واللي بعده توقفو بالكوبري.

ماعدا شايب لم يجد له مكان فتقدم بعد الكبري وتوقف فذهب اليه الضابط ووقع له وقاله انت ناجح راجع

مرور بريده بعد اسبوع…..
س8/هل سبق لك ان حصلت على مخالفه مروريه؟

ج8/بعد ساهر اضن مافيه احد بيسلم منه جائتني مخالفه باسمي وهي في الحقيقه على احد ابنائي

لان سيارته باسمي وهذه التي اتذكرها……

س9/هل سبق وان رافقت مع احد بالمستشفى؟

ج9/عندما اصيب عبدالله الفرحان(رحمه الله)بالعموده لم يكن موجود الا انا وعبيد الخلف(رحمه الله)وعليان الزامل (رحمه الله)

واخذناه ونقلناه الى مستشفى عنيزه ورافقت عنده اسبوع وعبيد ذهب الى ابنه عبد الرحمن بالاحساء

ليخبره …….فكانت ايام جدا عصيبه علي نظرا لقوة اصابته رحمه الله اسال الله العلى القدير ان يتغمد روحه

الجنه هو واموات المسلمين اجمعين......وفي ختام هذا 

اللقاء اتمنى ان يكون قد حاز على اعجابكم وارجوا ان تعذرونني على القصور

والسلام عليكم ورحمة الله وبركاته

  تابعنا على تويتر
  تابعنا على فيسبوك

أضف تعليقك



التعليقات المنشورة لا تعبر عن رأي "موقع الوهيبات الرسمي" ولا تتحمل أي مسؤولية قانونية حيال ذلك، ويتحمل كاتبها مسؤولية النشر. تمنع التعليقات الطائفية او التي تتضمن شتائم او تعابير خارجة عن اللياقة والأدب وللإبلاغ عن أي تعليق مخالف يرجى تنبيهنا باستخدام هذا النموذج .

التعليقات (0)

لا يوجد تعليقات

المشاركات و التعليقات المنشورة بأسماء أصحابها أو بأسماء مستعارة لا تمثل الرأى الرسمى لموقع (الوهيبات) الرسمي بل تمثل وجهة نظر كاتبها